Heis til himmels, og 11 andre ting å gjere i Loen
Under den mektige Jostedalsbreen, heilt inst i Nordfjord ligg Loen. Perfekt for å utforske fjell og natur i løpet av dagen og nyte velvære og avslapning på kvelden.
Norges lettaste topptur
Den nye og høgthengande attraksjonen i bygda er pendelbana Loen Skylift, som tek deg frå fjordkant til fjelltopp på fem minutt. Du stig ombord i ei av dei to vognene, Hugin og Munin. Etter eit svev på nokre minutt er du på toppen av fjellet Hoven, 1011 meter over havet. Her startar mange flotte, godt skilta stiar for alle nivå. Oversikta du får frå toppen av Hoven er grunn god nok til å teste pendelbana. Du kan sjå Skåla og Lovatnet i aust, Jostedalsbreen og Olden i sør og Nordfjorden som strekkjer seg mot Stryn i vest. Sommaren 2020 opna også ziplines her oppe. I Hoven Restaurant kan du nyte lokal mat frå ein rikhaldig meny, og her finn du bar med uteservering. På taket av restauranten finn du SkyShop med alt frå gåveartiklar og klede, til kaffi, is, kanelbollar og vafler.
Loen Skylift. Foto: Marius Beck Dahle/Loen Skylift
Test motet i ziplina
På toppen av Hoven 1000 meter over fjorden har Loen Active opna to splitter nye zipliner som er henholdsvis 125 og 95 meter lange. Fly over øvste delen på Tungejølet, med utsikt mot hengebrua i Via Ferrata Loen. Ziplinene ligg berre 5-10 min gange frå toppstasjonen til Loen Skylift, og er lokalisert ved stien frå Via Ferrata Loen, og vil også vere ei fin avslutning for dei som har klatra opp. Finn ut meir
Flying Fox Loen. Foto: Marius Beck Dahle/Loen Skylift
Vandre i luftlinje - Via Ferrata Loen
Det fins andre og meir strabasiøse vegar til topps på Hoven. Ein av dei er ein klatresti, eller Via Ferrata, som startar bak Hotel Alexandra nede i Loen. Som ein del av ruta opp mot Hoven, kan du krysse den 120 meter lange Gjølmunnebrua, den lengste Via Ferrata-brua i Europa. Den er spent opp 750 meter over fjorden, så det er gode sjansar for litt kiling i magen. I 2019 opna også den nye ekstrem-ruta Ragnarok, for dei med styrke og erfaring. Guida turar foregår gjennom Loen Active.
Gjølmunnebrua i Via Ferrata Loen. Foto: Loen Active/Simon Sjökvist
Skåla
Eit anna høgdepunkt i Loen er 1848 meter høge Skåla. Denne toppturen vert rekna som den i Norge med størst høgdeforskjell frå fjord til fjell. Her oppe er det mogleg å overnatte i Skålatårnet som har blitt kåra til Norges mest spesielle turisthytte. Den nye og flott designa turisthytta, Skålabu, ligg like ved sidan av, og skal avlaste det ærverdige Skålatårnet. Skålabu er opa heile året, og er ypperleg for toppturfolket vinterstid. Om du vil ha mindre strabasiøse turar anbefaler vi turar i Lodalen, rundt Loen sentrum og på Hoven. Turkart for Loen-Lodalen får du kjøpt hos Loen Active og Loen Skylift.
Skåla med utsikt mot Lodalen og Jostedalsbreen. Foto: Sverre Hjørnevik/Fjord Norway
Lodalen
Lodalen er ei nasjonalromantisk perle, og dalen si dramatiske historie gjer dalen heilt spesiell. Inst i dalen ligg Kjenndalsbreen, som er Jostedalsbreen sin lavaste brearm. Lenger nede ligg den sjarmerande setra Breng, som er eit ynda fotomotiv. Bødalen er ein av sidedalane, og her finn du Bødalssetra som er utgongspunktet for turar til sjølvaste Lodalskåpa ("Vestlandsdronninga") (2083 m.o.h.). Frå 1. juli til 13. august kan du la bilen stå og hoppe på Loen Shutte, som køyrer strekninga Loen-Kjenndalen tre gongar dagleg.
Lovatnet og Lodalen. Foto: Sergey Bogomyako/Fjord Norge
La borna få fritt spelerom i Loen Play
I sentrum av Loen finn du eit eige lite lite univers for borna, med kjekke utfordringar for både kropp og hovud. Perfekt på grå dagar, og når dei vaksne har fått bestemme programmet litt for lenge. Loen Play tilbyr aktivitetar for alle born, og i første etasje finn du aktivitetshuset for dei frå 3-12 år, samt ei avdeling for dei aller yngste. I kjellaren er det aktivitetar for dei litt eldre borna.
Full fart i Loen Play. Foto: Christer Lunde Solberg
Padle på fjorden
Om du føretrekk det våte element, er det ingen grunn til å styre unna Loen. Loen Active tilbyr kajakkturar på fjorden og Sande Camping leiger ut robåtar og kanoar. Kjenndalstova leiger også ut kanoar. Loen Active leiger også ut SUP-brett og trøbåtar på fjorden.
Padling på fjorden. Foto. Marius Beck Dahle/Loen Active
Sightseeing på Lovatnet
Likar du større båtar, kan du bli med kanalbåten MS Kjenndal over Lovatnet. Den har plass til 100 passasjerar, og går i trafikk mellom Sande og Kjenndal på utvalde datoar i sommar. I Kjenndalen ligg kafeen Kjenndalsstova. Det er også mogleg å nå kafeen for eiga maskin, med å leige sykkel hos Loen Active og trakke innover Lodalen.
MS Kjenndal II på Lovatnet
Jostedalsbreen Nasjonalpark på nært hald
Jostedalsbreen nasjonalpark omkransar Loen, med ei grense som går eit stykke oppe i fjellsida. Innanfor verneområdet finn du Kjenndalsbreen, som ligg i enden av Lodalen, og Bødalsbreen i dalen ved sidan av. Langs den fine turstien eit stykke før Bødalsbreen ligg Bødalssetra, ei stor og idyllisk seter. Om du vil ta eit djupdykk i geologi og historie anbefaler vi ein tur til Jostedalsbreen Nasjonalparksenter i Oppstryn.
Kjenndalsbreen.
Fisketur
Sande Camping leiger ut både robåtar, kanoar og fiskeutstyr, så du kan ta ein tur på Lovatnet og prøve å få ein ørret på kroken. Det er gratis fiske i heile Lovatnet, så fiskekort er ikkje naudsynt. Gjennomsnittsvekta på ørreten i vatnet er ca 200 gram, og den største fisken som er fått i garn i det siste er på heile 9,2 kilo. Turid og Magne gjev enkel opplæring og gode råd.
Lovatnet. Foto: Nordlandsblog/Fjord Norway
Lodalskåpa - Vestlandsdronninga
I likhet med Skåla ligg også fjelltoppen Lodalskåpa inne i nasjonalparken, 2083 meter over havet. Dette er det høgste fjellet i nasjonalparken, og vert kalla Vestlandsdronninga. Turen er lang, og er anbefalt å gå med guide.
På veg til Lodalskåpa. Foto: Jan Heggheim
Spa deg ned
Som ei avslutning på ein sprek dag, eller som ein avslappande pausedag, kan en tur i badeanlegget på Hotel Alexandra anbefalast. Anlegget har eiga spa-avdeling og inne- og utebasseng. Merk at anlegget kun er ope for buande gjestar.
Alexandra Bad på Hotel Alexandra. Foto: Marius Beck Dahle
Bli her litt lenger og oppleve meir?
Med Loen som base kan du enkelt nå andre flotte attraksjonar og aktivitetar som Briksdalsbreen, Geirangerfjorden, det nye vikingsenteret Sagastad, og til og med nå heilt til kysten på berre 1,5 time. Dei aktivitetssøkande kan teste den nye klatreparken i Stryn, sykle på stiar i Hjelledalen eller på Sandane, stå på ski på Stryn Sommerski eller surfe på Stadlandet.
Hoddevik. Foto: CH/Innovasjon Norge
Reise og bu
Loen ligg i Stryn kommune i Nordfjord på det vakre Vestlandet. Ta ekspressbuss frå Oslo, Bergen eller Trondheim, køyr bil, eller fly til Sandane, Ørsta/Volda eller Ålesund. Finn ut fleire detaljar om reiseruter her. Og overnattingsalternativ er det mange av. Eit av Norges beste hotell - Hotel Alexandra - ligg midt i Loen, og tett ved finn du koselege Hotel Loenfjord. Dersom du er ute etter sjølvhushald er dei nye leilegheitene til Loen Apartments eit ypperleg alternativ. Det er også mange hytter, campingplassar m.m. i området.
Hotel Alexandra i Loen
Deler av innhaldet vart først publisert på visitnorway.com